نصر مبدع دولة احنا اللى دهنا الهوا دوكو

تتبدى سمات
الفهلوة فى الشخصية المصرية من خلال بعض الألفاظ الدارجة على ألسنة الناس
مثل : " إحنا اللى دهنا الهوا دوكو , إحنا اللى خرمنا التعريفه , إحنا اللى
علمنا النمل يمشى طوابير , نعمل من الفسيخ شربات , بنفهمها وهى طايره " .



والاخ نصر كاى مصرى صميم شرب من مية النيل عقد نيته انه يستفيد من كل
الامثال دى وانه يضرب المثل لاولادنا الصغيرين فى كيفية الوصول لارقى
المناصب بدون الحاجه الى دراسة او تعليم او خبرة وان سر الخلطة سهل اوى
شوية فهلوة على خفة دم مع دروس فى الرقص الشرقى للرجاله وهوب تروح اى مكان
انت عايزه

رحلة السيد نصر لارتقاء اعلى الاماكن على حسب دعوة الست والدته لم تكن صعبة
ولا تستاهل الدعا من اساسه , فكل اللى كان مطلوب منه انه يشترى جهاز
كومبيوتر نص عمر وياخد وصلة نت من عم على اللى اخر الشارع ويعافر بقى وينزل
كام برنامج من بتوع الموفى ميكر على فيديو ايدتنج وبعد محاولات ليست
بالكثيرة نجح نصر فى انه يعمل اول كليب وجرى بيه على رؤساءه وطبعا نظرا
للجهل المدقع اللى هما فيه كانت فكرة ان حد يعمل كليب فى دماغهم مساوية
تماما لاخراج فيلم تيتانك

فتم اعتماد السيد نصر مخرجا رياضيا ونظرا لفكاكة نصر وفهلوته عرف ان اقصر
الطرق للوصول الى القمة فى الاعلام الرياضى فى بلدنا هو انك تبقى احمر من
احمر واحد فيهم فابتدى نصر مغازلة الحمر بكام كليب لحبيب البسطاء على كام
فيديو قص ولزق لملك التحركات وطبعا مانسيش ان يستغل كورسات الرقص الشرقى
فكان رقصه فى الملاعب المصرية عقب اى انتصار للحمر بمثابة حجر الاساس فى
وصوله للقب احسن مخرج رياضى مصرى

بالطبع هو احسن مخرج رياضى فى بلد ال 50 مليون احمر فى بلد لم تعد الكفاءة
والخبرة والدراسة تلعب اى دور فى تولى المناصب بها وحلت خفة الدم والفهلوة
والانتماء ومسخ الجوخ بديلا عنهم.....



فى الظروف العادية مكنتش هادوش دماغى فى كتابة 3 اسطر عن عبقريه نصر لكن
بصراحه اللى حصل فى الاسبوعين اللى فاتو تخطى كل حدود الصبر وعلى راى الست
ام كلثوم انما للصبر حدود ففى حلقة بتاريخ 21 ابريل الماضى قرر المخرج
الجهبذ انه يثرى البرنامج بتاعه وينزل هدف البايرن فى ليون فى احدى فقرات
البرنامج

ولان معلومات الفهلوى عن التعامل مع الفيديو من اديتنج وكاتنج وتحويل صيغ
زى معلومات العبد لله عن الذرة قرر الفهلوى اولا انه مايعرفش حاجه اسمها
قانون حماية الملكية الفكرية فدخل اى موقع من مواقع بير السلم اللى بتنزل
الفيديوهات سرقة ونزل من عندهم هدف البايرن وبالطبع اى عيل صغير تعامل مع
الانترنت لمدة ساعة هايعرف ان الفيديو هاينزل من مواقع المشاهدة بصيغة .flv

والصيغة دى طبعا ماتنفعش فى الدمج والادتنج للفيديوهات فقرر نصر ان يستخدم
برنامج لتحويل الصيغة دى لصيغة تنفع زى ال .avi or .mpeg وطبعا لان الفهلوى
شغال بمنطق احنا اللى دهنا الهوا دوكو قام منزل برنامج من الانترنت على
سبيل التجربة وهو طبعا مايعرفش ان البرامج دى لازم تشتريها ويكون معاها
السريال بتاعها عشان تحول الصيغ بدون ان تكون النتيجة مارايناه

وطبعا لان مافيش حد يحاسبه او لان اللى المفروض يحاسبه اكثر احمرار منه
واكثر جهلا عدى الموضوع على سلام وظل الفهلوى فى مكانته العالية يتلقى
اشادات مقدم البرنامج الاحمر وصاحب القناة الاحمر منه



على هامش الموضوع

-يتسائل الفهلوى لماذا يكرهه جمهور الزمالك ولماذا يرفض مجلس الادارة توليه
اخراج اى ماتش يكون الزمالك طرفا فيه وكأن انتمائه اللى اعلنه مئات المرات
للحمر او رقصه مع جماهير الحمر بعد مكسبهم فى اى ماتش بيخرجه او مايدعى انه
كليبات بتكون فى الاغلب منها موجة لاهانة الزمالك والتريقة على لاعبيه
وتمجيد ملك الحركات وحبيب البسطاء وكأن كل ده ماحصلش وكل ده اوهام فى خيال
الزملكاوية

و الأبداع
الأكبر في قناة مودرن هو لوجو برنامج حصاد الأسبوع و سندعك ايه القارئ
الكريم لتحديد كيفية الابداع في هذا التصميم الرائع بمشاهدة هذه الوجو في
الموقع الشهير deviantart.com و الذي تم اضافته للموقع في عام 2006 و لا
نعلم ان كان هذا اللوجو من تصميم المبدع محمد نصر ام احد اخر و لماذا لم يتسال احد اللوجو الذي هو عن عبارة عن علم جنوب افريقيا بترتيب الوانه على اللاعب الذي يقوم بركل الكرة ام اعتبره الجميع في القناة انها الوان الفرق في الدوري و لن يشعر احد بان اللوجو تم - لطشه - و الشعب المصري طيب القلب و سيفرح بهذا الابداع .

أضغط هنا لمشاهدة اللوجو في موقعه الأصلي

و للمبدع
محمد نصر بعد الكليبات المنقولة من موقع youtube
الشهير يمكنه مراسلة اصحاب الكليبات التالية لكي يتعلم كيف يقوم بعمل كليب و يتعامل مع
الكمبيوتر و منه لله طاهر القويري من يوم ما عمل المسابقة و كل واحد جمع 5
احمر و 5 الوان كسب كمبيوتر و افتكر نفسه بيل جيتس

جميع حقوق الكليبات محفوظة
لليوتيوب